Mætti taka alla flugelda úr umferð fyrir mér ..

Ég vona að það sé bara tímaspursmál þangað til við förum að hætta þessari sprengjuhríð.  Þessu flugeldaregni sem einu sinni stóð nú bara yfir á gamlárskvöld,  en er nú farið að rigna öll jólin og langt yfir áramót svo aumingjans dýrin titra og skjálfa og vita ekkert hvað er að gerast! - 

Stjörnuljós og mild blys - væru nóg og kannski ein og ein flugeldasýning sem væri stýrt af hjálparsveitum. -    

Mér finnst ókostirnir  - mengun; loft-og hávaðamengun - og svo hversu þetta hræðir mörg dýr vera alveg nægileg rök fyrir að hætta þessu.   

Ég forða mér yfirleitt út á land um áramót, til að þurfa ekki að vera í mengun og hávaða, en er heppin að búa þar núna :-)  ..  Auðvitað verður eitthvað skotið upp í kringum mig, - en vonandi sem minnst. 

Kúlublys tekið úr umferð

Ég vil þakka þessu fólki fyrir að vera fulltrúar þjóðarinnar ..

Það er ansi hátt hlutfall þjóðarinnar sem stendur með Báru.  Ekki komst nema brot a þjóðinni til að standa með Báru í dag,  - svona í holdi,  en hinir sem komu ekki eða komust ekki voru með í anda og þakka þeim sem mættu og sýndu stuðning. - 
Það væri ógnvænlegt að standa ein gegn þessu veldi sem þeir virðast stýra, fjórmenningarnir. 

Áfram Bára og við öll.   

 

„Þjóðin er að springa“

Nóg af landi, nóg af mat, nóg af peningum .... en ekki nógu mikill kærleikur

Svona förum við með börn þessa heims,  og það er þyngra en tárum taki.  Ég var að skoða greinar um matarsóun, bara í fyrradag, þar sem verslanir voru að farga heilu kössunum af grænmeti.  Einhvern veginn er þetta allt svona vegna þess að við höfum skapað heimskerfi þar sem gæðunum er misskipt.  Hvað er þetta annað en eigingjarn heimur,  þegar að við viljum hafa allt út af fyrir okkur? ..    Hinir mega ekki njóta þess sem við höfum? -    Já, ég segi "við"  því við erum öll íbúar á jörðinni og ættum að skipta því sem hún gefur okkur réttlátlega með okkur. 

Því miður er ég líka forrituð á þennan máta,  eins og flest annað fólk, en viðurkenni vitleysuna og ég trúi því einlæglega að ef við mannfólkið værum kærleiksríkari þá deildum við öllum heimsins gæðum á réttlátari hátt. 

Það er hægt að byrja með viljayfirlýsingu.  Í stjórnarskrá Bandaríkjanna stendur að allir menn séu skapaðir jafnir,  en það getur engan veginn gengið upp þegar að þeir meina sumum að vera jafnir.   Þá verður þetta í besta falli "Animal Farm" Orwells,  þar sem "Sumir eru skapaðir meira jafnir en aðrir" ..   

Blessað barnið að lifa svona æfi og aumingjans faðir hennar sem var að leita að betra lífa fyrir sig og stúlkuna sína.  

 

Sjö ára stúlka lést í haldi

Kona fer í stríð ..

Það þarf hugrekki til að stíga fram, vitandi að það verða afleiðingar.  En um leið tel ég að Bára viti nú þegar að það eru margir sem standa með henni og styðja þessa afhjúpun.  

Auðvitað þarf að virða lög landsins og þá líka persónuverndarlög, en ég vil minna á að stundum brýtur nauðsyn lög, - eins og frelsarinn  benti ítrekað á í hinni helgu bók. 
 

Svo er annað sem stendur í Biblíunni og það er þetta með að sannleikurinn geri okkur frjáls, og ég held að það sé annar punktur sem styðji þessa uppljóstrun.   

Bára minnir mig svolítið á kvenhetjuna sem barðist við kerfið í kvikmyndinni Kona fer í stríð,-  og hver hélt ekki með henni?   

Ég held með Báru. 

 

Bára fer fyrir héraðsdóm á mánudag

Virðingin kemur ekki utan frá ...

Fólk sem kemur fallega fram við hvert annað og starfar af  heilindum fyrir þjóðina skapar virðingu fyrir Alþingi,  hvort sem það er klætt í gallabuxur eða glansföt.  

Hér er það innihaldið sem virkilega skiptir máli.  

Gallabuxur fyrir neðan virðingu Alþingis

Flateyjargátan - meiri skömm að vera einstæð móðir en að búa með ofbeldismanni ..

Það var gaman að fylgjast með Flateyjargátunni á RUV og ég missti ekki af einum þætti.  Það var ekki síst tíðarandinn í þáttunum sem vakti áhuga minn,  klæðnaður fólksins og einnig hugarfar varðandi náungann. -   Þetta var gamli tíminn, og gamla hugarfarið, - og þá hugmyndirnar um hvað væri skömm og hvað væri ekki skömm. 

Í lokaþættinum kemur fram að aðalsöguhetjan hafði reynt að flýja sambýlismann sinn sem beitti hana miklu ofbeldi, andlegu sem líkamlegu, og setjast að hjá föður sínum.   Hann, "smitaður" af hugmyndafræði samtímans sendi dóttur sína til baka í fang ofbeldismannsins,  vegna þess að skömmin var svo sterk.   Kannski var það "kærleikur" þess tíma, eða faðirinn taldi sér trú um að hann væri að hlífa dóttur sinni við dómi samfélagsins, - og um leið var hann að hlífa sjálfum sér við þá dóma að vera faðir einstæðrar móður með "lausaleikskróga" .. ein og samfélagið kallaði stundum þau börn sem fæddust utan hjónabands.   
Það voru þessir óvægnu dómar hins harða umheims sem rak ungar konur í fang þeirra sem þær voru að flýja.  Auðvitað var þetta ekki kærleikur,  heldur ótti sem er andstæða elskunnar.

Sem betur fer eru tímarnir breyttir,  en þó ekki alveg.  Enn er til fólk sem hangir saman á almenningsálitinu.   Það veit ég vegna þess ég hef spurt:  "Hvers vegna skilur þú ekki við hann/hana ef þér líður svona illa í sambandinu? -  og svarið var "Hvað segir fólk?" .. 
Þá erum við ekki að tala um ungar konur eða unga menn, -  heldur jafnvel rígfullorðið fólk.  Fólk sem er í sumum tilfellum fast í alkóhólísku sambandi.  Það eru alls konar dæmi. 

Það er vont að vera fangi hugarfarsins, -  því að þetta fólk, sem er orðið eldra (og líka hið yngra)  þarf kannski ekki endilega að hlusta á einhvern annan segja "Það er skömm að vera einstæð" - eða  "Það er skömm að skilja"  .. eða hvað sem það er sem "syngur" í höfðinu á þeim,    Það eru auðvitað eigin fordómar og hugarfar sem er erfiðast að eiga við. 

Þessi hugsun  "Hvað finnst mér um mig?" ..   

Það er hugrekki að stíga út úr hugarfarinu sem hefur kannski verið innrætt frá bernsku - og standa upp fyrir sjálfum sér og rugla ekki saman óttanum og elskunni.   

Hlustum á sérfræðinga í fötlunarfræðum

Þegar ég fór að vinna á Sólheimum í Grímsnesi á sínum tíma, notaði ég alls konar röng orð vegna þess að ég vissi ekki betur.  Ég nefndi fólkið þar til dæmis "vistmenn" og gerði mér ekki grein fyrir að það væri rangt.  En um leið og mér var bent á það, sá ég villuna.  Fólkið þar voru bara íbúar Sólheima, en engir "vistmenn"  en það var að sjálfsögðu ekki af neinu nema fáfræði sem ég vissi það ekki. - 

Sérfræðingar í fötlunarfræðum vita sínu viti.  Ef þeir vilja ekki vinna með Önnu Kolbrúnu þá ber að hlusta á þá, og kannski sýna örlitla auðmýkt? -  Hvers vegna velur Anna Kolbrún ekki að víkja þar til niðurstaða siðanefndar kemur í ljós í stað þess að sitja sem fastast?  

Stolt?  Það er engin skömm að því að sýna auðmýkt, - og eiginlega alveg hið gagnstæða.  

Ég mæli með því að hlusta á sérfæðinga í fötlunarfræðum.  

Reyndar er eitt orð sem skiptir mestu máli þegar kemur að öllum mannlegum samskiptum, hvort sem það eru samskipti við fólk með fötlun eða ekki fötlun:  Það er orðið VIRÐING.  

Af virðingu við hin fötluðu myndi ég, í sporum Önnu Kolbrúnar,  víkja en ekki sitja. 

Ég er viss um að niðurstaða sérfræðingana er byggð á virðingu við fólk með fötlun. 

Hyggst sitja áfram í velferðarnefnd

Hverjar eru afleiðingarnar?

Hvaða afleiðingar hefur það í för með sér að vera dæmd sek um persónuverndarbrot? - 

Er það bara svona skammarbréf  "Skamm Bára þú mátt aldrei gera þetta aftur!"? .. 

Persónuvernd með Klausturmál í skoðun

Rétt kona á réttum stað!

"Fötluð, hinsegin kona og öryrki" .. 

Og hvaða hópar voru það sem sexmenningarnir voru að ræða (og hæða)  á Klausturbarnum?  Það er ekki nema von að Báru hafi ofboðið - og varla trúað eigin eyrum. 

Ég trúi ekki á tilviljanir, - og þessari konu, henni Báru hefur verið ætlað að vera stödd þarna til að leiða sannleikann í ljós.  Svo einfalt er það bara! - 

Mér fannst pínku "skondið"  þegar að Sigmundur sagði í einu viðtalinu: "Öl er annar maður" því að ég hef alltaf heyrt þetta: "Öl er innri maður" ..   en svona er hægt að hagræða,  svipað og markalínunni er hagrætt -  hvað er í lagi og hvað ekki er í lagi hvað varðar siðferði. 

Twitter þakkar Báru: Kona ársins

Fólk mun gleyma .....

Stundum er erfitt að átta sig á fólki - og hef ég stundum gripið til orða Maya Angelou "I´ve learned that people will forget what you said, people will forget what you did, but people will never forget how you made them feel." Eða, "Ég hef lært það að fólk mun gleyma því sem þú sagðir, fólk mun gleyma því sem þú gerðir, en fólk mun aldrei gleyma því hvernig þú lést því líða." Lilja Alfreðsdóttir hefur afskaplega fágaða og yfirvegaða framkomu og viðmót, og jafnvel þó hún sé í raun með stórar yfirlýsingar, þá eru þær settar fram af yfirvegun og um leið einlægni sem gera hana trúverðuga. Á sama hátt - eru aðrir sem geta talað og talað og eiginlega sama hvað þeir segja, þá eru þeir "ósympatískir" .. (veit ekki orðið á íslensku). -- Það væri hægt að mótmæla þessu máltæki Maya Angelou og segja, annað fólk á ekki að hafa áhrif á líðan okkar, það er allt undir okkur sjálfum komið. En kannski "á" það að vera svoleiðis, en við erum líka svo tengd - við mannfólkið hvert öðru að við hreinlega höfum áhrif, ... og þá er gott að skoða sjálfan sig og pæla hvort við séum að gefa góða strauma út í andrúmsloftið eða slæma? - Það er reyndar löngu sannað að það sem hefur mest áhrif á fólk eru ekki orðin eða verkin, heldur viðmótið! - Maya Angelou vissi þetta og nú vitum við þetta líka!

„Þeir eru ofbeldismenn“