Elskum börnin og þá lýkur stríði ...

 Við gerum voðalega mikið af því að benda.  Ísraelsmenn eru vondu kallarnir, Hamas skæruliðar eru vondu kallarnir.  Hvar sem stríðsrekstur er eru "vondir kallar" .. og þegar ég tala um þessa vondu kalla, er ég auðvitað að vitna í málfar barna. -  

Þegar við horfðum á Kúrekamyndir í gamla daga, hverjir voru þá vondu kallarnir, indjánar eða kúrekar? -  Ætli kúrekar hafi ekki verið fullir sjálfsréttlætingar um leið og indjánar? -  Þeir hafa væntanlega hvorugir litið á sig sem "vonda kalla."    

Hjá indjánum og kúrekum voru væntanlega líka börn.  Tilheyrðu þau hinum vondu eða góðu?  

Hvers eiga blessuð börnin að gjalda?  

 

En lítum okkur nær, - stríðið geisar ekki bara útí heimi, heldur inni á íslenskum heimilum.  Þar eru börnin svo sannarlega fórnarlömb.    

Þetta stríð milli Ísraels og Palestínu er eins og stríð sumra foreldra eftir skilnað. Það eru börnin sem eru fórnarlömb, þar sem annars staðar.

Þetta er valdabarátta sem bitnar á þeim sem síst skyldi. Það er sorglegt þegar völd og hlutir er orðið mikilvægara en líf og heilsa barna.

 
 það eru fjölmargar fjölskyldur - foreldrar á Íslandi í svona stríði. Þegar við getum farið að leysa þau stríð og setja börnin þar í fyrsta sæti, höfum við náð þroska. 

Birtingarmyndin er önnur og miklu meira áberandi þegar áþreifanlegum sprengjum er kastað, enda er líkamlegt ofbeldi sýnilegra, hitt er andlegt og tilfinningalegt - og sárin ósýnileg, en þau eru í einhverjum tilfellum jafn ljót og þau sem sýnd hafa verið í fréttum frá Palestínu.

Í Palestínu er talað um að þau séu notuð sem mannlegir skildir.  Hvað er ekki gert í skilnaðarmálum? Börnin eru sett fremst á spjótin,  - og það er í raun óvinnandi stríð.   

 
Börn eiga að fá að vera börn, - hvar sem þau búa í heiminum. 

Ef við gætum ÖLL sett börn í fyrsta sæti, framar en peninga og völd, þá væru engin sveltandi börn eða stríðshrjáð börn og engin börn í tilfinningaklemmu milli foreldra.    

Um leið og við elskum börnin, - þá lýkur stríði,  öllu stríði. - Já við "fullorðin" eigum að taka þetta til okkar, hvert og eitt einasta.

 

Tár sem er fullt af ást,

fellur í mannhafið

og því fleiri tár sem falla

fyllist hafið af meiri ást. 

 

Elskum meira - miklu meira ..