Naflaskoðun

5.8.2014 | 20:31

Að mörgu að hyggja við skilnað ...

Eins og glöggir lesendur kannski taka eftir þá er ég að blogga við frétt þar sem verið er að segja frá námskeiði sem ég hef haldið undanfarin ár. -

Það sem er mikilvægast að mínu mati, er að fá skilning. Hvort sem það er við skilnað eða aðra sorg lífsins. -

Fólk verður stundum alveg brjálað út í sinn fyrrverandi maka, - en reiðin er oftast vegna þess að viðkomandi þráir að þessi fyrrverandi sýni skilning. Stundum verður fólk reitt út í sjálft sig, reitt vegna þess að það gerði ekkert í málunum, - ekkert fyrr en það var of seint.

Á þessum málum, eins og öllum þeim sem tengjast mannlegum samskiptum eru margar hliðar. Fólk kemur með sjálft sig inn í samband, og kannski er það ekkert endilega í góðum málum þegar það byrjar samband en ætlast til að makinn bæti allt upp. Þegar það svo ekki gerist, verður það fyrir vonbrigðum.

Það þurfa allir að huga að sínum grunni, taka ábyrgð á sinni velferð, heiilsu og lífi. Setja mörk þegar þeim er misboðið og yrða upphátt vonir sínar og væntingar og ekki ætlast til að makinn sé hugsanalesari. -

Einu sinni skrifaði ég eftirfarandi:

"Ég á skilið að eiga góðan maka, ég þarf á samneyti, nánd og snertingu aðila af gagnstæðu kyni að halda eins og svo margir. Ég væri að ljúga ef ég þættist ekki þurfa þess. Ég á skilið maka sem stendur mér við hlið og hann á skilið maka sem stendur honum við hlið.

Ég á skilið jafningjasamband, heiðarleika, traust og það að vera elskuð eins og ég er og þurfa ekki að sanna mig, eða betla um athygli. Ég á skilið maka sem veit hvað hann vill. Hann á líka skilið að ég segi honum hvað ég vil."

Allt of mörg pör yrða ekki væntingar, langanir sínar og þrár við hvort annað og fara svo í fýlu þegar að þær eru ekki virtar. -

Grunnurinn að góðu sambandi er því heiðarleiki, traust og ást.

Svo skaðar ekki ef makinn er skemmtilegur ;-)

Ef heiðarleiki er ekki fyrir hendi, er það eins og að byggja hús á sandi.

Þau sem mættu í sunnudagaskólann vita hvernig fór fyrir því húsi.