Vondir menn eða vondar gjörðir?

"The greatest wisdom is in simplicity. Love, respect, tolerance, sharing, gratitude, forgiveness. It's not complex or elaborate. The real knowledge is free. It's encoded in your DNA. All you need is within you. Great teachers have said that from the beginning. Find your heart, and you will find your way."

Úr speki Maya indjána. 

"Guðs ríki er innra með yður."  

Úr Biblíu kristinna manna. 

"Find your heart, and you will find your way." - 

Hér er verið að tala um að finna eða þekkja hjarta sitt og fylgja því. 

En hvað er átt við hér með orðinu hjarta? .. 

Latneska orðið core þýðir hjarta, enska orðið core þýðir kjarni.  Enska orðið courage þýðir hugrekki. 

Þegar verið er að tala um að þekkja eða finna hjarta sitt, er verið að vísa í það að komast að kjarna sínum. - Hinum innra manni.  

Það þarf líka hugrekki til að fylgja hjarta sínu en fylgja ekki bara þeim sem á undan ganga.  Þegar við fylgjum hjartanu er auðvitað meiri hætta á árekstrum,  og jafnvel vonbrigðum,  en við lifum þá í heiðarleika við okkur sjálf. 

Það flókna við þetta allt saman er spurningin: "Hver er ég?" -

Hver er ég eftir að búið er að strippa af mér það sem búið er að innprenta mér frá æsku - hver er ég án titla, menntunar,  atvinnu, fjölskyldu .. eða alls sem dags daglega skilgreinir mig? 

Er ég vond/ur eða góð/ur? ... 

Ég trúi þvi að allir menn séu góðir í kjarna sínum,  en öllum mönnum sé hægt að spilla sé rétt aðferðafræði notuð.  

Það er þess vegna sem við þurfum stundum að fara varlega í að stimpla fólk gott eða vont.  Jú, gjörðir þeirra eru vondar eða góðar, - það er oft ekki erfitt að sjá það,  en er fólkið vont, vitlaust, illa upplýst -  illa upp alið, eða bara illa innrætt?  Úr hvaða menningarheimi kemur það?

Samskipti geta verið vond og gjörðir vondar, - en er fólk í hjarta sínu/kjarna sínum vont? 

Ef að fólk á að fylgja hjarta sínu, verður það að þekkja hjarta sitt,  annars er fólk að fylgja hugmyndum eða kenningum annars fólks og/eða hópa fólks. 

"Faðir fyrirgef þeim því þau vita ekki hvað þau gjöra" eru þekkt orð Jesú Krists á krossinum.  

Fólkið átti skilið fyrirgefningu vegna fáfræði sinnar.  

Fordómar eru fáfræði. 

Stundum er talað um að hægt sé að meta þroska mannsins eftir hversu auðvelt hann eigi með að setja sig í spor annarra.  

Getum við gengið án dómhörku um þennan heim og farið alveg í hinn endann sýnt náunganum samhygð?  Líka þeim sem gera ljóta hluti? 

Myndin "Dead man walking"  tekur á þessu þar sem nunna gerist trúnaðarvinkona manns á dauðadeild.  Það voru ekki allir sáttir við að hún skyldi sinna þessum manni, eftir óhugnanleg voðaverk hans.  En þessi saga sýnir inn í líf og inn í hjarta þessa manns sem var, eftir allt, bara týndur sjálfum sér.

 

Ef að allir menn horfðu inn á við,  finndu kjarna sinn - kjarna sem væri góður? - væri þá von á að heimurinn yrði betri? 

Ég trúi því. 

"Elska skaltu náunga þinn eins og sjálfan þig" ... 

 

Athugasemdir

[Guðrún Emilía Guðnadóttir, 15.1.2012 kl. 10:29]

Eins og ævilega snertir það mig að lesa þína pistla Jóhanna mín

[Jóhanna Magnúsdóttir, 15.1.2012 kl. 10:46]

Takk Milla mín, - þessar spurningar mínar eru liður í leit að mínum innra manni - eða konu ..  ein alltaf í naflaskoðun! - En ég held að við séum í raun öll í sömu eða svipuðum hugleiðingum, og þess vegna leyfi ég mér að yrða þetta upphátt. 

[Jóhanna Magnúsdóttir, 15.1.2012 kl. 11:07]

p.s. pistillinn minn er íhugun m.a. eftir þessar pælingar - smellið HÉR

[Ásthildur Cesil Þórðardóttir, 15.1.2012 kl. 12:37]

Góður og sannur pistill Jóhanna mín.

[Sigurður Alfreð Herlufsen, 15.1.2012 kl. 14:38]

Jákvæður og uppbyggjandi er pistill þinn, eins og þín er von óg vísa!

Mig langar aðeins og koma með annan vinkil í þessari hugleiðingu.

Ég trúi á endurholdgun og lögmálið um orsök og afleiðingu, eins og meirihluti jarðarbúa gera.

Þannig hefur maður ákveðið munstur að styðjast við. 

Hér erum við til að læra og til að láta gott af okkur leiða.

Við skiljum betur af hverju sumir fæðast við óskaaðstæður og lífið er þeim ljúft.

Aðrir fæðast við ömurlegar aðstæður og þeim eru næstum allar bjargir bannaðar og þeirra líf verður einn táradalur.

Sem betur fer ert þú og ég í sólarlandinu, þar sem erfiðleikarnir eru smávægilegir miðað við það sem verst er. Það má segja að okkar erfiðleikar séu meira svona verkefni daganna, sem hægt er að vinna sig út úr með þrautseigju og góðum vilja.

Þinn hlutur er veigamikill og blessunarríkur og ég endurtek þakklæti mitt fyrir það.

[Aðalheiður Jónsdóttir (IP-tala skráð) 15.1.2012 kl. 16:21]

Kærar þakkir fyrir góða hugleiðingu Jóhanna mín.

[Jóhanna Magnúsdóttir, 15.1.2012 kl. 16:41]

Takk Ásthildur

Takk Aðalheiður

Takk Sigurður  

Kommenta nánar á þetta síðar, - er að hlaupa út í göngutúr! ;-)