Tannkrem og súkkulaðidagatal

Þegar Eva Lind dóttir mín var lítil stelpa, kannski svona sex til sjö ára tókum við okkur frí frá tvíburunum sem voru fimm árum yngri en hún, og fórum mæðgurnar í jólainnkaup í Miklagarð sem þá var og hét.

Eva hafði fengið að gjöf frá afa sínum súkkulaðidagatal. Þar sem tannlæknafélagið hafði gert athugasemd við að börnin væru að borða súkkulaði á hverjum degi 24 daga fram að jólum hafði Lionsmönnum, þeim er seldu dagatölin, dottið það snjallræði i hug að líma eitt stykki tannkremstúpu á hvert dagatal. Evu fannst ekki minna til þessarar fínu tannkremstúpu koma en sjálfs dagatalsins og allra súkkulaðimolanna. Ég hafði síðan útskýrt fyrir henni mikilvægi þess að bursta tennur eftir súkkulaðiát og því væri gott að fá tannkrem með súkkulaðidagatalinu.

Jæja, þar sem við vorum búnar að versla heilan helling í Miklagarði, settumst við niður til að fá okkur hressingu, ég kaffi en hún svala og Staur (en slíkt gúmmelaði er líklegast ekki fáanlegt lengur). Eva beit í Staurinn, sagði svo með undrunarsvip og svo hátt þannig að allir nærstaddir heyrðu til "Mamma -  það er tannkrem inni í súkkulaðinu mínu"

 

Athugasemdir

[Jónína Dúadóttir, 14.12.2009 kl. 22:24]

Yndisleg... eins og börnum einum er lagið

[Jóna Kolbrún Garðarsdóttir, 15.12.2009 kl. 00:47]

Staurar fást alltaf annað slagið í Bónus.  Frábær tannkremsbrandarinn. 

[Ía Jóhannsdóttir, 15.12.2009 kl. 09:35]

Mig rámar eitthvað í þessi dagatöl.  Skemmtileg hún Vala þín.

[Ásthildur Cesil Þórðardóttir, 15.12.2009 kl. 09:44]

Ég keypti einmitt svona tannkremstúpudagatal fyrir mínar skottur.  Og þær voru mjög hrifnar af tannkreminu.  Ef þú ert að meina freyjustaur þá fást þeir alltaf alla daga ársins, núna tveir saman í pakningu alltaf jafn góðir. 

En sagan er flott. 

[Sigvarður Hans Ísleifsson, 15.12.2009 kl. 14:56]

hahaha eins gott að borða ekki staur :P

[Jóhanna Magnúsdóttir, 16.12.2009 kl. 00:31]

Takk öll fyrir athugasemdir, ég hafði ekki hugmynd um að Freyju staur væri enn lifandi, svona er ég lítið fyrir súkkulaðið sko!