Óvissa á óvissu ofan

Það eru alltaf einhverjir óvissuþættir í lífi okkar, - en þeir aukast þegar fólk greinist með krabbamein.  Það koma upp allskonar biðtímar,  biðin eftir niðurstöðum úr greiningu, biðin eftir aðgerð o.fl. sem er kvíðavekjandi.  

Dagsetningar verða eins og vörður í lífi krabbameinssjúklings.  Það að vita af vörðunni er smá styrkur.  Það er þennan dag sem ég fæ að vita þetta, - það er þennan dag sem ég á að fara í þennan skanna/meðferð/aðgerð o.s.frv. -  Þessar vörður skipta máli. 

Svo er verkfall - og engin varða, -eða hún tekin og færð, eitthvað þar sem hún ekki sést. Ekki er vitað hvar og hvenær næsta varða verður.  Óvissustigið eykst og það bætir í vanlíðan sem var fyrir.  

Ef við ætlum að kalla okkur siðmenntaða þjóð þá verður þessu ástandi í heilbrigðismálum að fara að linna.  

Bera læknar ábyrgð?  Geislafræðingar?   Eða bera stjórnvöld ábyrgð á því að fjöldi fólks veður nú í villu og svima og finnur engar vörður?  

Það getur vel verið að svona upplifi ekki allir þetta, - en ég tala út frá eigin nafla eins og venjulega.  Ég átti að hefja undirbúning fyrir geislameðferð í dag, en fékk hringingu á föstudag um að hún frestaðist um óákveðinn tíma.  Maður þarf ekki að vera á einhverfrófi til að svona skipulagsbreytingar setji mann út af laginu.  

Þegar við erum sjúklingar erum við viðkvæm fyrir, - pinku skelkuð.  Ekki gera illt verra! 

 

 

Vinnudeilur ógni sjúklingum

Athugasemdir

[Jón Þórhallsson, 11.5.2015 kl. 16:15]

"LEITIÐ GUÐSRÍKIS!". (Matt.6.33) =Hver stendur næst "GUÐI" í dag; í heimi sem er á heljarþröm??? Er BISKUP ÍSLANDS AÐ SPYRJA þjóðina einhverra spurninga eða er þjóðin AÐ LEITA svara á einhverju tengt lífsgátunni?

http://thjodarskutan.blog.is/blog/thjodarskutan/entry/1643136/

[Anna Sigríður Guðmundsdóttir, 11.5.2015 kl. 20:35]

Hingað til hefur ekki þurft kjaravinnudeilur láglaunaðra, ómetanlegra og góðra hjúkrunarfræðinga á Íslandi, til að skilja þá staðreynd, að bæði láglaunasjúklingar og láglaunahjúkrunarfræðingar hafa verið kaupmáttarsviknir, í áratugi.

Jafnvel hafa kannski í einhverjum tilfellum krabbameinsgreindir hjúkrunarfræðingar ekki haft kaupmátt til að greiða fyrir krabbameinsmeðferð/lyf/vinnutap/sjúkrahúsferðir?

Fólk verður að taka sig mjög mikið á, í eigin hugarfarsbreytingu, og hlífa hvorki sjálfum sér né öðrum við gagnrýni. Þeirri sorglegu staðreynd verður ekki afneitað, að á Íslandi er ekki, og hefur aldrei verið siðmenntað kaupmáttar/heilbrigðiskerfi.

Þetta er alls ekki nýr sannleikur undir sólinni, heldur sí-endurtekin misréttis-fjarstjórnuð svikastefna heims-kúgunar-veldisins.

M.b.kv.

[Heimir Lárusson Fjeldsted, 12.5.2015 kl. 13:45]

Finn til samúðar með þér Jóhanna, hef sjálfur reitt mig á hinar ýmsu vörður og kennileiti í leitinni að bata. Hef oft þurft að taka á honum stóra mínum í biðinni vegna launadeilna heilbrigðisstéttanna.

[Sigurbjörg Eiríksdóttir, 12.5.2015 kl. 22:08]

Hvað getur þetta gengið lengi!