Dellulaus forseti ...

Einn af mínum uppáhaldsprófessorm talar oft um bréf í skeytastíl, þ.e.a.s. þegar fréttirnar eru skrifaðar í fljótheitum og lítill þráður á milli þeirra.  Ég, í minni (oft of miklu) tölvunotkun, hef tekið eftir því að ég hugsa stundum í svona skeytastíl eða Facebook-statusum.  Ég fór í smá sveitaferð og ákvað að skilja tölvuna eftir heima í rúman sólarhring, en ég losnaði ekki við statusana úr hausnum. (Þarf eflaust lengri "afvötnun") 

Þar sem ég var að aka hálfmeðvitundarlaus undir Hafnarfjalli hlustaði ég á fréttir, fyrst um eitthvað Dellusafn sem verið er að setja á laggirnar á Flateyri, í næstu frétt kom Ólafur Ragnar forseti og fór að tala um hans  "hans heilagleika páfann" .. - heilagleikatalið fór eitthvað í pirrurnar á mér, eflaust vegna pirrings á yfirborðsmennsku .. og þá kom þessi Facebook status í hugann - og ég held að ég hafi sagt það líka upphátt: 

"Finnst að Ólafur Ragnar Grímsson eigi heima á Dellusafni" ... 

Þrátt fyrir þetta skyndihugmynd, þ.e.a.s. þetta með forsetann á dellusafnið, þá verð ég að segja það að mér fannst það rétt niðurstaða hjá dellukallinum  að beita málskotsrétti varðandi Ixxxxx (er komin með ofnæmi fyrir þessu svo ég skrifa það ekki að fullu), þegar  svona stór hluti þjóðarinnar kemur með áskorun um það og ekki síður vegna þess að málið er það stórt að það vissulega varðar alla þjóðina.

Fleiri statusar sem komu í hugann úr sveitaferð: 

• sneiðir niður sveppi á Landnámssetri og fær borgað í mat 
• hitti Mr. Skallagrímsson "in person" ..
• stjörnubjart í Huldukoti 
• á systur sem skar sig næstum á púls (óvart) ..
• sofnaði yfir Disney mynd um kjúkling
• heimsótti góðan vin á Snæfellsnesið
• fauk heim og sparaði með því bensín..
• íhugar dellulaust forsetaframboð

Athugasemdir

[Sigurður Þórðarson, 6.3.2011 kl. 18:01]

Alltaf góð!

[Jens Guð, 7.3.2011 kl. 00:44]

  Þegar ég gerðist blaðamaður fyrir næstum fjórum áratgugum (poppskríbent) var ég gagnrýndur fyrir að skrifa ekki í skeytastíl.  Mér var bent á að það væri samasemmerki á milli góðrar blaðamennsku og fjölda punkta.  Það er meira að segja til eitthvað orð eða hugtak yfir góðan texta sem mælist út frá fjölda punkta (stuttra setninga).  Því knappari sem skeytastíllinn er þeim mun læsilegri var hann sagður vera.

  Það er svo sem ágæt þumalputtaregla að forðast innskotssetningar og annað sem teygir á texta.  Mestu máli skiptir þó að hugsun textahöfundar komist til skila.  Önnur regla sem ég lærði síðar var að orða texta út frá talmáli.  Í töluðu máli notum við styttri setningar en í ritmáli.  

[Guðrún Emilía Guðnadóttir, 7.3.2011 kl. 09:46]

Eins og ævilega, bara góð