Byrgjum brunninn áður en barnið verður að hrotta ...

Ég hlustaði á viðtal við  Mumma í Mótórsmiðjunni á Bylgjunni áðan,  en verið var að ræða hið hræðilega Stokkseyrarmál þar sem ráðist var á mann og honum misþyrmt á svo hrottalegan hátt að manni flökrar við. - 

Ég las lýsinguna á því í gær, og var hugsað til þessara ribbalda sem hika ekki við að meiða aðra mannveru. -  

Það þarf ekki að segja neinum neitt um það að það eru mjög skaddaðir einstaklingar á ferð, einstaklingar sem þó hafa einu sinni verið hvítvoðungar og væntanlega nærst við móðurbrjóst. -

Eitthvað fór úrskeiðis, - það hlýtur að vera, a.m.k. í flestum tilfellum. -  

--

Fyrir nokkrum árum sat ég í nokkrar vikur og las skýrslur úr mismunandi áttum um brottfall nemenda úr námi í Framhaldsskóla, - niðurstaða - undantekningalaust var á þá leið að það þyrfti meiri forvarnir og þær þyrftu að byrja fyrr. - 

Hér er ég ekki að segja að unglingar sem falla frá námi séu verri einstaklingar, heldur er ég að benda á að þarna gildir sama lögmálið, -  lögmálið um gildi forvarna. 

Þetta er sama sagan - alltaf - við erum ekki að læra þetta með brunninn og barnið, - brunnurinn stendur opinn og barnið fellur ofan í og svo er farið í rándýrar aðgerðir við að sækja barnið ofan í brunninn, ef það er ekki orðið of seint og mannslíf farið. -  

Miðað við hvað við erum orðin "gáfuð" virðumst við vera treg-gáfuð. -  Allar skýrslur segja, vinnum í rótunum, - notum forvarnir. - Mummi í Mótórsmiðjunni sagði það líka, - sagði að það þyrfti að vinna betur með börnum og unglingum og hlúa að þeim.  - EKki væri t.d. til unglinga-athvarf á Íslandi eins og í flestum vestrænum löndum.   

Unglingur í vanda sem leitar til félagsþjónustu fær kannski viðtal eftir 3 vikur, - það dugar ekki.  

Unglingavandamál eru líka iðulega fjölskylduvandamál, - jafnvel þó að allt líti vel út á yfirborðinu hjá fjölskyldunni er væntanlega um að ræða alls konar krísur, meðvirkni, alkóhólismi, ofbeldi - eða hvað sem er. -

Við getum reytt arfa endalaust, en ef við tökum hann ekki upp með rótum þá kemur hann upp aftur og aftur og aftur ....

Hvað er hægt að gera? 

Ég held að ef hlustað væri á klárasta fólkið á sviði uppeldis, fólks eins og Möggu Pálu hjá Hjallastefnunni og þeirra sem kenna kærleikann,  myndi vera hægt að fara að hlúa betur að börnum og unglingum.  

Að hlúa að börnum og unglingum er ekki að ofdekra þau, heldur að kenna þeim um orsakir og afleiðingar,  setja þeim mörk o.s.frv. -

Að hlúa að börnum og unglingum er að greina hæfileika þeirra þegar þau koma inn í skólann, og byggja undir greindir þeirra en ekki einungis leita að því sem þau geta ekki eða leita að frávikum frá normi. -

Að hlúa að börnum og unglingum, er að kenna þeim sjálfstyrkingu og samkennd með náunganum. -

Þessu þurfa heimili og skóli að vinna að saman. 

Mummi talaði um að aðeins broti af þeim málum sem kæmu til barnaverndaryfirvalda væri sinnt. -  Hvað er það? -  Af hverju eru til peningar til að byggja nýtt fangelsi -  en ekki að leggja meiri peninga í barnavernd? -

Hvað er að?

Þeir sem skilja ekkert nema talað sé í peningum eða gróða ættu meira að segja að fatta þetta, því þegar upp er staðið græða allir,  bæði andlega og veraldlega. -  

Hrottar eru líka fólk, - ég hef trú að það sé hægt að koma í veg fyrir hrottaskap með fræðslu, umhyggju, samkennd, mannúð, kærleika -  að okkur standi ekki á sama um hrottana,  því einu sinni voru þeir börn sem vildu bara leika.

Kannski tók einhver dótið þeirra og þeir lömdu hann og fengu þá dótið sitt til baka - og enginn kenndi þeim að það var rangt, eða þeir voru lamdir í spað og kunna ekki önnur viðbrögð. -

Ég leyfi mér að trúa að mörgum sé við bjargandi, þó að það sé e.t.v. ekki öllum. -

Það þarf auðvitað að taka úr umferð þá sem kunna ekki að vera í samfélagi og meiða mann og annan, - en það þarf líka að huga að grunninum.  

Á sandi byggði heimskur maður hús - og húsið féll.  Það eru ekki ný vísindi.

Af hverju að byggja á sandi, þegar kletturinn er til staðar?

Þessu verður ekki breytt á einum degi, en einhvers staðar verður að byrja,  og lengi býr að fyrstu gerð. -

LEGGJUM FJÁRMUNI Í SKÓLAKERFIÐ OG STYÐJUM JAFNFRAMT FORELDRA TIL AÐ VERÐA BETRI UPPALENDUR -  EFLUM ANDLEGA IÐKUN ÞAR SEM KÆRLEIKUR,  SAMKENND MEÐ NÁUNGANUM OG SJÁLFSTYRKING  ER KENNSLUEFNI NÚMER EITT, TVÖ OG ÞRJÚ. -   

Forgangröðum upp á nýtt og byrgjum brunna.  

Það margborgar sig.  

 

 MAKE LOVE .....

 

Athugasemdir

[Ásthildur Cesil Þórðardóttir, 11.12.2013 kl. 20:00]

Sammála þér, hef verið að hugsa þessi mál og er sorgmætt yfir því hvernig fólk getur orðið, og hvers vegna það er orðið að slíkum skrímslum sem opinberast hér, það er eitthvað mikið að. 

[Rafn Haraldur Sigurðsson (IP-tala skráð) 11.12.2013 kl. 20:26]

Tek undir með þér og sérstaklega síðustu málsgreininni sem þú skrifar alla með stórum stöfum, en vildi þó breyta þessu með brunninn.

"Byrgjum barinn áður en barnið dettur í það!"

[Jóhanna Magnúsdóttir, 11.12.2013 kl. 21:52]

Já, það er tilfinningin Ásthildur, - sorg, - en svona virðist maðurinn geta orðið ef aðstæðurnar og umhverfi leyfa. Rétt, það er eitthvað mikið að!

[Jóhanna Magnúsdóttir, 11.12.2013 kl. 21:54]

Takk Rafn, - ég leyfði mér nú bara að snúa upp á þennan vel þekkta málshátt.

Já flestir eru sammála um að skapa kærleika, sem betur fer, í stað stríðs.

[Ásthildur Cesil Þórðardóttir, 12.12.2013 kl. 00:10]

Já það er eitthvað mikið að... samfélaginu, eins og þú segir, það er hægt að byggja enn eitt fangelsið, en ekki stofnun sem tekur við unglingunum okkar á jákvæðan hátt með sérfræðingum sem hjálpa þeim og aðstoða út í lífið aftur, það er hægt að hjálpa svo mörgum með trausti og kærleika, en það virðist ekki vera vilji til þess hjá þeim sem hafa þau völd að geta það því miður. Ég er búin að tuða um þetta núna í um 30 ár, og það hefur ansi lítið breyst til batnaðar því miður.

[Jóhanna Magnúsdóttir, 12.12.2013 kl. 00:21]

Já, ég var að sjá tillögur að nýju fangelsi og þar var verið að tala um hvað hönnunin passaði nú flott inn í umhverfið og eitthvað bla bla yfirborðsmennska, sem mér líkar ekki. -

Ég kvartaði undan sambærilegu þegar börnin mín voru í gamla Lækjarskóla, þá voru alltaf að falla niður hjá þeim kennslustundir vegna fjarveru kennara, en í byggingu var glæsibygging, nýr skóli sem lítur út eins og alþjóðabankdi. -

Innviðirnir voru í basli, en byggja átti fínt utan um börnin.

Óttalega hvað stjórnendur virðast blindir á það sem skiptir máli, - við verðum hvert og eitt okkar að rækta okkur innan frá og þannig þarf samfélagið líka að gera. -

Auðvitað á að vera athvarf þar sem unglingar geta leitað og þau fái hjálp við hæfi og við styðjum þau yngri til að þau þurfi sem fæst að leita í athvarf eða stofnun, eins og þú segir Ásthildur, sem gæti hreinlega "endurmenntað" þau út í samfélagið.

[Jón Þórhallsson, 12.12.2013 kl. 09:47]

Það eru til LAUSNIR sem hægt væri að koma upp í öllum kaupstöðum landsins og eru þegar í gangi. Þetta þyrfti að vera launað starf til að halda í gott fólk og þess vegna að árangurstengja fólk með einhverjum hætti.

=T.d. að skátafélagsforingjar gætu fengið 10.000kr. aukagreiðslu fyrir hvern þann næði að vígjast úr skátunum.

Lengi býr að fyrstu gerð.

https://www.facebook.com/pages/Hjálparsveit-Skáta-Skagafirði/128223907228347?ref=ts&fref=ts

[Jóhanna Magnúsdóttir, 12.12.2013 kl. 15:32]

Jón Þórhallsson, já - góður punktur hjá þér, ég var sjálf starfandi í skátunum sem barn og unglingur, og eitt sinn skáti ávallt skáti, að sjálfsögðu. Kannski mætti virkja skátahreyfinguna betur :-)