Dagur jarðar 22. apríl 2012 - hvað ef þú ert jörðin? -

Hver manneskja er veröld út af fyrir sig.  Hver manneskja er jörð,  a.m.k. efnafræðilega tengd jörðinni segja vísindamennirnir í "Symphony of Science"  en þeir bæta líka við að við séum öll líffræðilega tengd. -  Auðvitað vilja margir bæta við, "andlega tengd"  og þar á meðal ég. - 

Við erum s.s. öll skyld og við erum öll tengd jörðinni. - 

Öll framkoma okkar ætti að einkennast af virðingu fyrir lífi. - Ég er bara að tala um okkar eigin framkomu, - hver og ein/n setji fókusinn inn á við en ekki út á við núna ;-) -  Okkur hættir iðulega til að fara að hugsa hvernig hinir eru að gera,  hvað hinir eru vondir o.s.frv. - 

Ef við förum inn á við, íhugum okkar eigin heim og jörðina okkar - líkama okkar,  hvers konar "umhverfissinnar"  erum við þá? - 

Erum við að hella í okkur eitri? 

Erum við að borða eitthvað sem veldur okkur vanlíðan? 

Eitthvað sem verður til þess að við vöknum með bólgna fingur og hringar sitja fastir? 

Eitthvað sem hleður fitu í kringum hjartað, - hjartað sem heldur okkur gangandi? 

Eitthvað sem stuðlar að krabbameinsmyndun? - 

Er okkur sama um þessa jörð? - Líkama okkar? - 

Hvað ef við uppgötvum að við erum í raun umhverfissóðar,  jafnvel hryðjuverkamenn? 

Það er skrítið að beina athyglinni svona inn í stað þess að vera með hausinn fullan af hvað hinir eru að gera. - 

 

Auðvitað gildir þessi aðferðafræði líka við inntöku andlegs efnis. - Eftir því meiri "sora" sem við innbyrðum þess meira rusl hleðst í kringum sálina okkar, - það verður erfiðara fyrir hana að skína, við verðum sorgmædd, þung og e.t.v. veik. -  Við verðum líka veik við neikvæðar hugsanir í eigin garð, dómhörku og skömm.  Skömmin byggir aldrei upp, brýtur bara niður. -  Það er því mikilvægt að það sem við veljum fyrir okkur sé það sem við skömmumst okkar ekki fyrir eða fáum samviskubit yfir, - það er upphafið að vítahring vondra tilfinninga. -  Ef við njótum ekki þess sem við erum að borða, sleppum því frekar. - 

Njóttu meðvitað hvers munnbita! .....

• Þú getur ekki notið nema að vera almennilega svöng/svangur
• Þú getur aðeins notið þess sem þér finnst í alvöru gott
• þú hættir að njóta matarins þegar líkaminn er saddur

 

Við höfum val 

Við höfum val um hreyfingu, mat sem örvar hvatberana okkar, hleður á okkur orku en ekki spiki og er fyrirbyggjandi fyrir sjúkdóma,  val um orð til að nota í eigin garð og orð í garð náunga okkar. -  (Orðin sem við beinum að náunganum virkar að sjálfsögðu sem bjúgverpill,  þannig að þegar við formælum öðrum erum við að formæla okkur sjálfum) .. 

............

 "Í allt líf er lögmálið ritað. Þú finnur það í grasinu, í trjánum, í ánni, í fjallinu, í fuglum himins, í fiskum sjávarins; en leitið aðallega að því í ykkur sjálfum" .......

"Guð skrifaði ekki lögin á blaðsíður bóka, heldur í hjörtu yðar og anda yðar. Þau eru í andardrætti þínum, blóði þínu, beinum þínum; í holdi þínu, maga, augum þínum, eyrum þínum og í hverju smáatriði líkama þíns." - 

 (Texti úr Friðarguðspjalli Essena, að vísu í eigin þýðingu). - 

"..en leitið aðallega að því í ykkur sjálfum." .. 

 "Guðs ríki er innra með yður." ... sagði Jesús Kristur 

Byrjum því heima, byrjum á að tína ruslið úr hausnum á okkur (sérstaklega skulum við fjarlægja súrar og útrunnar hugsanir)  og setja í svarta poka til brennslu á Sorpu,  síðan getum við, frá og með deginum í dag,  ef við erum ekki þegar byrjuð, farið að skipta út ruslinu sem við höfum innbyrt fyrir það sem nærir. -  

Þegar við förum að næra okkur með góðu verður minna pláss fyrir hið vonda. -  

Það sama gildir með hið andlega,  það sem við veitum athygli vex! 

Smá frásögn til gamans þessu tengt: 

Ég sótti um embætti prests á Þingeyri. - 

Þegar ég fór með umsóknina á pósthúsið, mætti ég manni sem ég hef ekki séð í mörg ár, en mamma hans er fædd og uppalin á: ÞINGEYRI 

Þegar ég kom í vinnuna eftir að ég fór með umsóknina beið mín tölvupóstur frá ÞINGEYRI, en þar var aðili sem ég hafði aldrei heyrt né séð áður,  að biðja mig um að halda námskeið. - 

Ég kíkti á forsetaframbjóðendasíðu Þóru Arnórs, og það eina sem ég sá þar var að hún var á leiðinni til ÞINGEYRAR.  

Og rúsínan í pylsuendanum: Ég fór að heimsækja mömmu á Droplaugarstaði og þar var auglýsing upp á vegg "Harðfiskur frá ÞINGEYRI" ...   

Öll þessi athygli vegna þess að ég veitti því athygli! - 

Þið þekkið það eflaust einhver að hafa keypt nýjan bíl og þá fyrst takið þið eftir öllum hinum sem eru eins. - 

Ef við erum með orð eins og LEIÐINDI í höfðinu á okkur,  þá veitum við vissulega öllu því leiðinlega athygli. -  Ef við erum með orð eins og GLEÐI í höðinu  á okkur þá veitum við gleðinni athygli. -

Hvort viltu hafa JÁ eða NEI í höfðinu? - 

Það sem við veitum athygli VEX 

Við getum nært hið jákvæða og við getum að sama skapi nært hið neikvæða. 

Við getum nært gleðina og við getum nært sársaukann. 

 

"Be the change ... "  sagði Gandhi. 

Dagur jarðar er þinn dagur,  hver stund er þín stund,  hver mínúta er þín mínúta og hver sekúnda er þín sekúnda,  tileinkuð þér. - NÚNA - 

Jörðin nærir þig, og þú nærir jörðina. -

Verum góð næring fyrir hvort annað.  

Móðir vor sem ert á jörðu,
Heilagt veri nafn þitt.
Komi ríki þitt,
Og veri vilji þinn framkvæmdur í oss,
eins og hann er í þér.
Eins og þú
sendir hvern dag þína engla,
sendu þá einnig til oss.
Fyrirgefið oss vorar syndir,
eins og vér bætum fyrir
allar vorar syndir gagnvart þér.
Og leið oss eigi til sjúkleika,
Heldur fær oss frá öllu illu,
því þín er jörðin
Líkaminn og heilsan.
Amen "

(Bæn úr Friðarguðspjalli Essena í þýðingu Ólafs frá Hvarfi) 

 

Gerum hreint fyrir okkar dyrum, gerum hreint innra með okkur.  Komum svo til dyranna eins og við erum klædd, við höfum ekkert til að skammast okkar fyrir. -

Semjum um frið,  hið innra og hið ytra. 

Gefum okkur gaum, gefum náunganum gaum, gefum jörðinni gaum, gefum lífinu gaum... gefum. 

Gleðilegan dag jarðar! 

 

GRÆNN APRÍL að hefjast

Athugasemdir

[Sigurður Alfreð Herlufsen, 22.4.2012 kl. 10:34]

Takk fyrir boðskap dagsins kæra Jóhanna.

Gjafmildi þín er stór!

Þú gefur okkur fagran dag með orðum þínum og orðum þeirra sem hafa veitt þér innblástur.

Allt sem þú segir harmonerar við það sem ég hefði viljað segja og það eykur gleði mína að finna þennan samhljóm í uppbyggjandi anda.

Svo tek ég eftir að þú hefur notið leiðsagnar Essena, hvorki meira né minna, en þeir eru taldir hafa alið Jesú Krist upp milli 20 til 30 ára held ég. Verið honum sjálfum leiðarljós og innblástur fram a vewginn.

Allt er þetta mér mikil gleði og ég endurtek kærar þakkir fyrir hugleiðingu dagsins.

[Ásthildur Cesil Þórðardóttir, 22.4.2012 kl. 10:35]

Takk fyrir þetta spark í rassinn Jóhanna mín.  Þú ert frábær.

[Jóhanna Magnúsdóttir, 22.4.2012 kl. 11:48]

Takk fyrir Sigurður Alfreð,  - ég á smá texta fyrir þig að lesa, sem er á wordpress blogginu mínu. - Hann er "spes" svo ekki sé meira sagt, en þar sem ég prédika að við höfum ekkert til að skammast okkar fyrir ætla ég að setja hlekk á hann hér, ég er pinku feimin við að setja hann á moggablogg þar sem hingað koma líka margir sem eru ekki endilega að leita að einhverju jákvæðu í mínum skrifum, heldur einhverju sem hægt er að höggva í eða hæðast að, og ég er bara mannleg og tek það stundum til mín þó ég reyni annað og viti að það á ekki að bíta. - Hlekkurinn er s.s. HÉR  og kallast sandkorn á strönd. -

Þakkir fyrir hvatninguna og lesturinn Sigurður. - 

[Jóhanna Magnúsdóttir, 22.4.2012 kl. 11:49]

Takk Ásthildur, - ég nota þetta sem "sjálfstal"  Ásthildur,  ég á það til að detta í ruslið þegar ég er sjálf "í rusli"  og þá byrjar vítahringurinn. -  Svo ég þekki að hið góða laðar að hið góða og öfugt, og veit þú þekkir það líka. -

[Ásthildur Cesil Þórðardóttir, 22.4.2012 kl. 12:27]

Já stundum gef ég mér samt ekki tíma til að njóta, þess vegna er svo gott að fá svona pistil til að minna mig á. 

[Jóhanna Magnúsdóttir, 22.4.2012 kl. 15:17]

Akkúrat,  -  það er þetta með tímann og að njóta. - Ég er að æfa mig líka! ..  ég er að rekast á þessar hugleiðingar úr mörgum áttum.  Þ.e.a.s. að njóta og lifa með meðvitund. -

[Ásthildur Cesil Þórðardóttir, 22.4.2012 kl. 16:30]

[Bergur Ísleifsson (IP-tala skráð) 23.4.2012 kl. 10:05]

Þurfið þið Ásthildur ekki að fá ykkur herbergi? Nei, bara að grínast ... en án gríns þá er það einmitt kjarni málsins að maður sækir í það sem maður er sjálfur með í höfðinu. Leiðindi sækja í leiðindi og gleðin sækja í gleði.

Þess vegna byrjar það góða heima, hvergi annars staðar. Ég vildi bæði að aðrir hefðu það alltaf í huga og ég sjálfur.

[Ásthildur Cesil Þórðardóttir, 23.4.2012 kl. 11:41]

Bergur málið er að þora að láta sér þykja vænt um fólk og viðurkenna það.  Og vissulega geislum við frá okkur því sem við setjum frá okkur á blogg og spjall.   Ég er nú samt oft að missa mig í reiðinni, en er að vinna að því að beina mér meira í ljós og kærleika, því þar líður mér vissulega betur. 

[Jóhanna Magnúsdóttir, 23.4.2012 kl. 13:13]

Bergur, - er tákn fyrir væntumþykju, hugrekki og kjarnann innra með okkur. - Því er um að gera að halda því á lofti! - 

Hugrekki= Courage (t.d. á ensku) sem er komið af latneska orðinu Cor sem síðan þýðir hjarta.  Core á ensku þýðir síðan kjarni. - Þannig að kjarninn er hjartað.  

Þetta er auðvitað smá orðaleikur, - til gamans og fyrir mér er það tákn um að tjá sig frá hjartanu, eða viljann til að lifa af heilu hjarta, það að vera heil. 

Við þurfum bara að vera meðvituð, vakandi fyrir okkur sjálfum, eða áhorfendur að okkur sjálfum þannig að við getum hnippt í okkur þegar við erum dottin í neikvæða gírinn. -  "Out of presence" - kalla gúrúarnir það.  -  Eða utan viðveru,  og það þýðir auðvitað að við séum fjarlæg okkur sjálfum og aðrir orðnir aðalpersónur í okkar lífi. -  Jafnvel óvinirnir sem eru farnir að hafa meira pláss í höfði okkar en við sjálf! - 

[Jóhanna Magnúsdóttir, 23.4.2012 kl. 13:14]