Vilt þú skilja?

Skilningur og skilnaður er sitt hvor hluturinn, - og í rauninni andstæður.

Að skilja í sundur stuðlar að aðgreiningu,  en að skilja hvort annað stuðlar að sameiningu. 

En það þarf tvo til að skilja. 

Hjón eru tveir einstaklingar svo það er mjög einfalt að skýra það, það eru tveir einstaklingar sem verða aðskildir. 

Að sama skapi þarf tvo til að skilja ef að hjónaband á að ganga upp.  

Báðir einstaklingar þurfa fyrst og fremst að skilja sjálfa sig og báðir einstaklingar þurfa að skilja hinn aðilann. 

Skiliningur er yfirleitt betri kostur en skilnaður, þó að skilnaður reynist oft óumflýjanlegur. 

En stundum er það einmitt skilningsleysi sem veldur skilnaði. 

Skilningsleysi á eigin tilfinningum og/eða skilningsleysi á tilfinningum makans. 

Fer ekki dýpra í bili. 

Vilt þú skilja? 

Í Lausninni erum við með ýmis úrræði fyrir fólk,  bæði hvað skilning varðar og skilnað.  Lausnir sem forvörn við skilnaði (þar sem skiliningur er í raun forvörn) og svo skilning fyrir einstaklinga eftir skilnað sem þegar er orðinn. 

Hjónanámskeið  (og fyrir sambúðarfólk) á döfinni í  Skálholti 7.-10. nóvember. 

Námskeiðið Lausn eftir skilnað - fyrir konur - 3. desember nk.  (setjum upp námskeið fyrir karla eftir áramót ef að þátttaka næst). 

Einkaviðtöl - lausnarmiðaða hópa - hjónaviðtöl - námskeið - fyrirlestra o.fl. 

 

Athugasemdir

[Guðmundur Ásgeirsson, 31.10.2011 kl. 14:26]

Hveru marga hjónaskilnaði hafa námskeið ykkar komið í veg fyrir?

[Jóhanna Magnúsdóttir, 31.10.2011 kl. 14:48]

Sæll Guðmundur og takk fyrir spurninguna. 

Ég held að það sé nokkuð erfitt að svara svona spurningu með tölfræði, því of margir hlutir koma þar inn í.  Ég efast á sama hátt að sálfræðingar, prestar eða aðrir meðferðaraðilar hafi það á takteinum hversu margir hafa hætt við hjónaskilnaði eftir sambandsviðtöl eða námskeið.  Það fer eftir forsendum hvers einstaklings eða hjóna -  og á endanum eru það að sjálfsögðu alltaf einstaklingarnir sem taka ákvörðun.  Oft er full seint í rassinn gripið og fólk fer ekki að reyna að skilja sínar aðstæður fyrr en allt er komið í óefni. 

Við teljum í raun að alltaf verði að skoða í grunninn, hver og ein manneskja þarf að skilja sjálfa sig, vinna í sjálfri sér - til að vita hreinlega hvað hún vill. 

Stundum heldur fólk að það vilji skilja vegna þess að makinn sé ómögulegur, en fattar ekki að líta í eigin barm.  Hvort það sé vegna þess að það sjálft sé að ýta undir hina ómögulegu hegðun makans.   Gerir óraunhæfar væntingar o.s.frv.

Við erum sérhæfð hvað meðvirkni varðar - og teljum í raun óraunhæft að veita ráðgjöf án þess að taka meðvirkniþáttinn inn í.  

Við erum að taka fyrstu skrefin í  eiginlegum hjónabandsnámskeiðum - en hjóna og sambúðarnámskeiðið i Skálholti er samvinnuverkefni með sr. Þórhalli Heimissyni en hann hefur haldið mörg námskeið fyrir hjón, en við komum inn með meðvirknihlutann.