Sala áfengis í matvöruverslunum - hagsmunir hverra? ...

Ég vil taka það fram - hér í upphafi, að ég er fylgjandi frelsi. Frelsinu til að velja og taka ákvarðanir. 

Lög og reglur, boð og bönn eru þó nauðsynleg, - t.d. í umferðinni, - það ríkti væntanlega kaos ef allir hefðu frelsi til að velja þar, hvort þeir keyrðu á vinstri eða hægri vegarhelming,  ækju yfir á rauðu eða grænu ljósi o.s.frv. -  Lög og reglur, boð og bönn eru sett til verndar okkur mannfólkinu. -

Fleiri reglugerðir eru í þessum dúr.

Í Biblíunni eru alls konar lögmál - og þar þykir mikilvægt að það séu lögmál sem séu sett mannsins vegna en ekki bara lögmálsins eða reglunnar vegna.  

Hvað með reglur um áfengiskaup.  Af hverju er ekki frjáls sala á áfengi? -

Kemur nokkrum það við hvað Gunna eða Jón kaupa mikið áfengi og hvar þau gera það?

Það er hættulegt (reyndar stórhættulegt) að aka á móti rauðu ljósi, - en er einhver hætta fólgin í því að aðgengi sé aukið að áfengi? -

Ráða ekki allir við sig, eru með frjálsan vilja og af hverju ætti ekki að mega selja áfengi hvar sem er?

Af hverju má ekki selja kannabis hvar sem er?  Eða af hverju er það ekki löglegt?  Nú eða kókaín?  Má fólk ekki bara velja? -

Áfengi er fíkniefni. -  Við megum aldrei gleyma því.   Fólk missir meðvitund - eða minnnkar meðvitund við neyslu þess.  Það er deyfilyf,  sem deyfir tilfinningar. - 

Óvirkir alkóhólistar þurfa að versla í matinn eins og annað fólk, -  og það hefur verið sannað að aðgengi skiptir máli hvað neyslu varðar. -  Fólk getur átt góða daga, sem það hefur fullan styrk, en fólk getur átt vonda daga og þá skiptir máli hversu fjarlægðin er mikil í flöskuna. -

Það er meðvituð ákvörðun - að aka í sérstaka verslun til að versla áfengi. Það er ákveðin yfirlýsing.  "Ég er komin/n hingað til að kaupa áfengi,  því að í þessari verslun er ekki annað selt." -  

Ef að hinn óvirki fer í matvöruverslun, þá er það auðveldara að "lauma" með í körfuna kippu af bjór, eða flösku af rauðu. - 

Hvern er verið að vernda með lögum um áfengiskaup?  -  Ég tel að það sé verið að vernda fjölskyldurnar í landinu.  Áfengisvandinn er gríðarlegur, - það eru heilu fjölskyldurnar og stundum ættirnar sem falla með alkóhólistanum. - 

Segjum að hann Maggi sé nýkominn heim af Vogi, -  er þá gott að hafa búrið fullt af áfengi? -  Hann eigi bara að geta staðist  freistinguna og þetta sé próf? -   Ég veit ekki hvort þið eruð svoleiðis, en ég er alla veganna þannig að ef ég finn kexpakka uppí hillu, þá er ég líkleg til að klára kexpakkann, þó ég hafi ekki ætlað mér það.   Þess vegna kaupi ég lítið af sætu, vegna þess að ég veit ég á erfitt með að standast freistinguna.    En það fæst kex og nammi útí búð! -   Já,  en það er langur vegur milli alvarleika þess að ein manneskja sé sólgin í sykur,  því það hefur ekki þessi dómínó-áhrif sem alkóhólisminn hefur.  

Það er ákveðin afneitun að halda því fram að allir geti umgengist áfengi sem sitt frjálsa val, því það er áfengið sem velur og alkóhól stjórnar mun fleirum en við viljum oft láta vera. - 

Ég tel að það sé ekki hagsmunir fjölskyldna í landinu að auka aðgengi að áfengi.  Ég tel það séu hagsmunir kaupmanna, og þau aukaspor eða aukaakstur sem þarf til að fara í sérverslun sé alveg þess virði til að vernda hagsmuni barna - og allra þeirra sem eru fórnarlömb áfengisfíknar annarra.

Auðvitað þarf að vinna meira að forvörnum, - styrkja fólk andlega svo það þurfi ekki sinn anda úr flösku. Auðvitað þurfa sumir að spyrja sig, - "What is wrong in my life, that I must get drunk every night" - eins og Fine Young Cannibals sungu um árið. -

Við gætum sagt að það sé menningarlegt að fá rautt og hvítt inn í matvöruverslanir, en spyrjum okkur líka hvort það gæti stuðlað að ómenningu, eða ómennsku? ..

Hagsmunir manna eða mammons? ...  

 

Athugasemdir

[Ásgrímur Hartmannsson, 13.9.2014 kl. 09:13]

Alltaf ná alkar í áfengi.

Þar sem þú vitnar í gamlan söng, skal ég vitna í annan fyrir þig:

"Portúgal hann teygaði,það gerði ekkert til, það tókst með honum yl í sig að fá."

Og svo framvegis. Fyrir þá sem ekki vita, þá var "portúgal" rakspíri. Ef ekki vildi betur drukku menn svo frostlög.

Alkóhól er vinsæll þynnir, og þess vegna alltaf aðgengilegt fyrir ... *rétta aðila,* skulum við segja.

Bönn gera öllum hinum erfitt fyrir.

[Jóhanna Magnúsdóttir, 13.9.2014 kl. 09:45]

Takk fyrir athugasemdina Ásgrímur, - það eru til rök með sölu áfengi alls staðar og það eru til rök á móti sölu áfengi - hvergi. -  Það er kannski bara spurning með mörkin. Og svo þurfum við að spyrja okkur hvernig best er að sporna við neyslu, - ekki þeirra sem þola áfengi, heldur þeirra sem þola það ekki og þá ekki síst vegna afleiðinga fyrir, ekki bara þessa einstaklinga, heldur samfélagið í heild. -  Einn áfengissjúklingur getur haft gífurlega mikil áhrif á líf margra. -
Það þarf að finna "illskástu" leiðina. -  Ef hún er að auka aðgengi að áfengi, þá það.  En ég hef ekki trú á að það sé leiðin. 

[Geir Jónsson (IP-tala skráð) 13.9.2014 kl. 10:29]

Sykur er líka fíkniefni og veldur margföldum skaða á við áfengi. Byrjað var á skattlagningu hér sem hefur engin áhrif haft nema hækka aðeins í ríkikassanum. Sérbúðir fyrir sykurbættar vörur til að minnka aðgegið .

[Hrólfur Þ Hraundal, 13.9.2014 kl. 11:28]

Ég held að það sé rangt hjá þér að þú sért maður frelsisins. 

Hvernig stendur á því að á skemmtistöðum á Íslandi er alltaf að minnstakosti fimmtán til tuttugu prósent gesta ofur ölvi? 

En erlendis þar sem vín er í boði á öllum götuhornum og alstaðar á milli þeirra þá sést ekki ölvaður maður, ekki heldur Íslenskur?

[Jóhanna Magnúsdóttir, 13.9.2014 kl. 11:50]

Sykur er fíkniefni - og sykur er eitur, - það eru fullyrðingar sem ég heyri oft.  Ég hef nú ekki séð miklar eðlisbreytingar á fólki við sykurneyslu,  þ.e.a.s. að það verði ofbeldisfullt, eða t.d. að það missi meðvitund og geri alls konar vitleysu, - missi aksturhæfileika o.s.frv.   Áfengisneysla eins hefur áhrif á aðra, - það er kannski aðalmunurinn.   Auðvitað getum við farið út í "extreme" með sykurinn og hugsað okkur að sykurfíkillinn fari sér að voða, - s.s. drepi sig úr sykuráti, og þá hefur það að sjálfsögðu áhrif á aðra í kring.  Það er enginn hættulegur undir stýri þó hann sé nýbúinn að borða súkkulaði :-)

[Jóhann Elíasson, 13.9.2014 kl. 19:50]

Það vill gleymast í þessu frumvarpi að til þess að mega selja áfengi, verður að gera dýrar breytingar á verslunarhúsnæðinu og verslanir verða að gera breytingar á mannahaldi sem eru kostnaðarsamar.  Á hverju halda menn að þessi aukni kostnaður lendi? Dreifingin verður dýrari en hún er í dag , hvar skyldi sá kostnaður lenda?  Til stendur að leggja leyfisgjald á þá sem selja áfengi, hver skyldi borga það?  Álagning matvöruverslana er hærri en Vínbúðarinnar.  Eru menn virkilega á því að áfengisverð hækki ekki við þessa breytingu?  Mér finnst persónulega áfengisverðið alveg nógu og hátt í dag................

[Grímur (IP-tala skráð) 14.9.2014 kl. 06:09]

Ríkið mun ekki lækka sitt áfengisgjald.

ATVR búðirnar eru með 10% álagningu á smásölu

Í Hagkaup verður einungis til sölu það áfengi sem Hagar flytur inn og smásöluálagningin verður hin hefðbundna 40%

 Ölum ÁTVR búðum verður lokað. 

Svo neytendur fá minna úrval og hærra verð, en frelsi  - til hamingju